Verhalen uit de regio

Vecaansie

Man… man wat is t ja weer drök in de winkels, je vernemen dat luu weerom kommen binnen van vecaansie. Ik wait nog wel dou wie kinder klain hadden en wie mit caravan vot west wassen. As je mit kinder van 3 en 5 op achterbaanke noar de Belgische Ardennen gingen den haar je wat om mans t is mor n uurtje of vieve rieden mor veurdat je t bord Zwolle zagen wassen de fruitella’s en de capri sun al op en begonnen ze te kribben en te blèren. As je den op stee wassen den mos t spul nog opzet worden carrevan mos wel n beetje schier woatterpas ston aans luip joe snachts t bloud noar de kop. Den mos veurtint der nog veur en de kastjes stoulen en toavel op stee mokt worden.  Den wer der mor n puude petat hoald mit kroketten der bie want je haren gain puf meer om eten te koken. Noa n nacht woarin je slecht sloapen haren vanwege een te klaaine bèr en een bataljon muggen, zit je lek stoken aan de ontbiettoafel. Mor as t den schier weer was haren kinder gaauw vrundjes en zaten te speulen op gras, den hadden je de handen vrij en kon je rusteg n boukje lezen in de zunne mit n lekker kop kovvie der bie… zo kon je t wel vattien doage oethòllen. Noa de vecaansie as je weer thoes wassen begon de elende, boudel mos wossen worden en t gras ston tot aan knainen, onkruud tussen tegels vot kraaben en inderdoad boodschoppen doun want moezen lagen dood veur koulkaaste. En den ston je ook in riege veur de kassa en kon je in winkel nergens bie kommen of t vak was leeg. Moandag binnen schoulen weer begonnen en motto van t verhoal is of je nou wel of nait op vecaansie west binnen as schoulen weer begunnen is t normoale leven weer aan gang… en keert de rust weer.

Cor Uildriks.

Pagina's