Verhalen uit de regio

t Widde gold

t Is weer zo wied zegt de vraauw, k heb kinder al bericht doan en aankomde zundag den kommen ze om drai uur. Ik kiek heur ais vanachter de kraande aan en wait nait woar t over gait. Gait der al n laamke branden zegt ze… ik schudde mit kop, n keerske den? ook nait? Ik snap der haldal niks van zeg ik. Asperges zegt ze den mor om mie oet de dreum te helpen. Verdolt hou kon ik dat nou vergeten t is weer asperge tied. Joa luu aal joar op n zundag in maai den kommen de kinder mit heur aanhang en ons klainkind bie ons asperges eten. t Is glad tredietsie worden wie doun dat al joaren. t Is vrijdag dus wie mouten dammee vot mor noar Trips om weer drai kilo op te hoalen, zo zegt zo doan wie hoalen ze altied rechtstreeks bie de boer vot, dai ze ook al veur oons schilt, dus dat scheelt. Weeromraaise geliek mor bie supermaakt aan veur de aandere ingrediënten. n Poar bainhammegies en gewone sneden ham saus en aaier hebben we nog zat want wie hebben tien hounder dai goud aan de leg binnen. Toes gait alles in koulkaast en ik kin t zundag zo op stel zetten. Zundag mörgen en ik bin drök in de weer om de boudel veur te beraaien. Panne stait op mit de aaier den kinnen dai vast koken, dou ze laank genog kookt haren heb ik ze eefkes schrikken loaten in panne kold woater den doppen ze beter. k Was vergeten dat t werkelek frisse aaier wassen ik kon ze nait tot dop oetkriegen nait huile in elk geval. t Het mie sikkom n uur kost veur dak genog ainigzins teunboare aaier haar. De rest van mien kookkunsten ging van n laaien dakje en stipt om drai uur zatten wie mit nander te smullen van t widde gold. Alles lag op n groode schoal mit de saus, aaier en ham der over der bie bainham mit podstoulen saus en eerappelpartjes oet de haide lucht frituur… man man man wat lekker…

Cor Uildriks

Pagina's