Kinder van groep 7 en 8 van de Europaschool in Muntendam willen mitdoun aan de Grunneger schriefwedstried dij aal joar uutschreven wordt deur Biblionet. Ze doun mit in t bibeltaikencluster Menterwolde-Veendam-Pekel.
Moandag 9 feberwoarie kwam Jan Groenbroek van Stichting Grunneger Toal op school om kinder van baaide groepen Grunnegs schrieven te leren.

Jan Groenbroek luit de kinder eerst t laidje ‘Bie de Lidl’ van Voorheen de Bende mit Pazzipanten heuren mit de tekst derbie, zodat ze tougelieks zain konden hou t Grunnegs speld wordt. Ze zongen dit populaire laidje vot uut volle borst mit.
Doarnoa las e zulf n verhoaltje veur, dat ze ook mitlezen mozzen en vervolgens lazen ze zulf om de beurt n stukje veur uut t boukje ‘Van Tisternait en Aalbegeer’ van Gré van der Veen. Noadat Jan Groenbroek de be- langriekste regels veur t schrieven van de Grunneger toal uutlegd haar aan de hand van de tekst dij de kinder veurlezen haren, mozzen ze zulf bedenken hou t verhoaltje wiederging en t produkt van heur fantasie opschrieven in t Grunnegs. Doarnoa moggen ze heur verhoaltje veurlezen en zain loaten of ze t ook aal goud schreven haren.
Dat ging meroakel! t Was verrazzend hou nuver sommege kinder noa n uurtje les al Grunnegs schrieven konden. Kinder hebben heur uterste best doan en ze hebben der n bult plezaaier aan had. As belonen moggen ze nog ainmoal ‘Bie de Lidl’ mitzingen. Groep 8 gaait t laidje zulfs instudaaiern veur de musical aan t end van t schouljoar.
De kinder van de Europaschool in Muntendam kennen nou de belangriekste regels veur t schrieven in t Grunnegs en kinnen vol vertraauwen mitdoun aan de Grunneger schriefwedstried.