Het winnende gedicht van Gré Rijskamp uit Zuidbroek:

Westerwolle, t Vervenen

Mit veenhaauw, stik en schuppen
begon t groaven van de gruppen
t uutdaipen van n spit of bol
kostte joaren, mor was weerdevol
om t veengrond dreug te leggen

Veenboas haar t veur t zeggen

Mit steker, sneden uut veenbaank
op moat moakt noast de krooiplaank
kroden de groavers, woare helden,
t stoken törf-stoet noar de zetvelden
t schoftuur kwam zuitjesaan in zicht

Veenkers konden heur plicht.

Veur de vraauw en kinderschoar
waarkten zai in t minsen-moor
en wat schier onmeugelk leek,
vruchtboarhaid veur d’haile streek
uut t broene gold, swait en troanen.

Gré Rijskamp

Het jurycommentaar:
Poëzie van de groden

Eerste pries. 
Dij is veur Gré Rijskamp oet Zuudbrouk. Zai het vaar gedichten inzonden over ‘Westerwolle’. d’Ain nog mooier as d’aander. Zai begunt mit Onstwedde. Moakt ons dail van t meandern van t wotter, t gewas dat ter gruit, iemen, koien, haaide, Juvvertoren en zundagpreek. Din gaait ze wieder noar Smeerling-Smilke en vertelt van iezer in t wotter, bomen dij gruien tot in d’hemel, van swaarde els en kwitsekralen. Weskenhoezen is din aan de beurt. n Glooiend gehucht woar baaide A’s bienander komen. t Vervenen is t leste gedicht en vertelt ons van t veule waark wat ter doan worden mos om t onvruchtboare gebied te veraandern. Steker, veenbank, krooiplank, veenhaauw, stik en schuppen. Dizze woorden geven aan dat Gré Rijskamp zuk goud verdaipt het in dit onderwaarp. Uut heur gedichten verneem je dat zai n schriefster is mit ervoaren. De eerste pries komt heur van ganser haarten tou.