Verhalen uit de regio

Kerst

“All i want for Christmas is you “ zong Mariah Carey op de achtergrond dou ik  met de vraauw deur de winkel luip om de boodschoppen veur de kerstdoage in hoes te hoalen. t Is net of ze de boudel weggeven zegt de vraauw. “Man wat n drökte, veurzichteg manouvraaide ze heur kaare tussen de minsen deur. Her en der zaten wat jongeluu dai veur de winkel de boudel bievullen mossen en t leek der op dat der meer oetging den dat ze der in zetten konnen. We kwamen net bie slagter vot doar haren we een dikke roloade kocht en was t ook al zo drök. Wie mouten ook nog eefkes noar gruinteboer veur spruuten en stoofperen herinderde ik vraauw en ik hoop dat t doar wat rusteger wezen zel. Intied wassen we bie kassa aanbeland en wui der net omroupen dat kassa 7 ook open ging, n poar minsen schoten der vot noar tou en dat scheelde ons weer in riege. Bie de gruinteboer vuilt aal wat mit en wassen we vlot kloar dou we weer noar auto luipen kwamen we bie euliekouken kroam langs en hebben we nog een puut euliebollen mit krinten kocht. Dou we thoes de boodschoppen onderdak sleept haren luiten we ons op baanke vaalen mit een kop kovvie en een euliekouk. Zo zee vraauw dat hebben we verdaind en dat was ik haldal mit heur ains. Aankomd weekend is t kerst en 1e kerstdag kommen ons vrunden Teake en Cato op verziede en goan we lekker mitnander eten. Wie binnen al zo,n dikke vatteg joar vrunden we vinden t aibels gezelleg dat ze kommen, kinder binnen groot en tot t hoes oet dai hebben heur aigen leven dus doar huiven we gain reken meer mit te hoalen. T zel onder t eten wel weer over vrouger goan dou der nog echte winters wassen en der mit kerstdoage n dik pak snaai lag, ach ie waiten mor nooit wat der nog oet de löcht vaalt zeg ik altied mor, t mokt t wel eerliekser as der een beetje snaai ligt. Zo kerstboom stait t eten en drinken is in hoes loat de feestdoage mor kommen. Luu wie goan der van groalen mit of zunder snaai en ik wèns joe n haile gooie kerstdoage tou en veul haail en zegen veur t naaie joar.
Cor Uildriks

Pagina's