Wie wassen al drai doage verstoken van internet en in dizze tied van snelle computers en het biehoalen van joen socioale media kin dat nait. Ik mos der dus wat aan doun. Ik heb stekkers van de modem en zo der oet had heb tien tellen wacht en heb stekker der weer in doan… huilp niks en ik kon t nait vinden. Oeteindelijk heb ik t nummer van koabel bedrief belt om road te vroagen. Dou tillefoon op nomen wer, klonk der aan de aandere kaant n aibels laif wichter stemmetje. Ik begon vot te vertellen dat mien internet t nait ede, dou ik inains in de goaten kreeg dat t wichtje deur mie hen zat te proaten. As joe preblemen hebben mit t internet toets twai heurde ik heur zeggen, vehip docht ik dat is n bandje. Snel drökte ik op twai, want ik haar ja wat mit t internet. Ik kreeg der n ander wichtje veur dai ook hail laif klonk en net dou ik weer begunnen wol mit mien reloas heurde ik heur zeggen, as je wat mit de rekening hebben toets ain enz. t Was weer n bandje… oeteindelijk zee t wicht as joe n mitwaarker aan tillefoon hebben willen dou den mor niks den gait t vanzulf. Noa n zatje kreeg ik den n vent aan andere kaant, “mit Jeroen” zee hai, “van t internet”. Ik denk ik zeg niks t kin wel weer n bandje wezen… “hallo”, zee e “is der aine”. “Joa”, zee ik veurzichtig “is dit gain bandje?” “Nee hor”, zee Jeroen “ie hebben n mitwaaker aan de liene.” Snel legde ik hom oet wat der loos was. “Dat kin kloppen hor”, zee e “wie binnen in joen omgeving bezig mit onderhold as t aal goud gait is t internet der over een poar uur weer.” Gelokkeg was dat ook zo en kon ik weer op t internet kommen, mor in t vervolg as ik weer n bedrief bel wacht ik eerst eefkes oaf of ik der n mins of n meschien veur krieg.

Cor Uuldriks