Fietse

In Sappemeer woar ik woon doar stikt t van de fietsen op weg, tegenover mien hoes doar binnen perkeerploatsen woar ik de auto stoan heb en as ik doar noar tou loop den mout ik aibels goud oetkieken dak nait overreden wor deur n fietser. Je hebben de fietsers in moaten en soorten en ook in verschilende vaailighaids categories; zo heb je de Moeke s dai de kinder van school hoalen. Ze zitten den op n zogenoamde Moeke fiets mit veur aan t stuur n kinderzitje en achterop ook aine sums ook nog een karregie der achter en doar zitten den een poar leutje beudels in. Over t algemain gait allemoal nait zo haard slingern ze wel n beetje mor binnen prima te ontwieken net as kinder op heur leutje fietsjes. Den heb je de categorie hoesvraauwen en hoesmannen dai der aankommen mit blik op oneindig en dai zain joe gewoon nait. Ze binnen der net achter kommen dat ze nog boodschoppen hebben mouten en jakkern nog gaauw mit mat aan t stuur noar winkel, as ik ze aankommen zai den blief k mor eefkes aan kaant van weg stoan tot ze der langs binnen. Schauljeugd joa ik vergeet ze nait ze zitten op de fietse mit n groode koptelefoon op en heuren wieder niks mor trappen joe stoicaains veurbie. Maistied rieden ze ook in n koppel woarbie summige den heur telefoon in handen hebben ze kieken der op mit ain haand aan t stuur en je zain heur doemkes de haile tied in de weer goan, ze hebben deugoans de haile weg neudeg, der zitten den ook nog van dai acroboaten tussen dai nog aine veurop zitten hebben en ik heb ze zulfs wel zain woar der achterop aine stait, ook den blief ik mor eefkes stoan tot de haile kudde de langs is. Den heb je nog wat òllegie s dai net haard genóg trappen om nait om te vaalen doar kin ik den maistied nog wel drai moal veur laangs dus dat is gain prebleem. De leste categorie dai ik nog eefkes aanstippen wil binnen de naaiemootse electriche fietsen ook wel E bikes nuimt. t Zucht der oet as n gewone fiets ze trappen hail langzoam of sikkom nait mor ze hebben n gloepste gang op ket. Veur dat je der op verdocht binnen rieden ze joe over tonen t is hail gevoarlek ze hebben gain beschaamde klaaier aan of n helm op kop voak ook nog zwoare vracht op pakjedroager of in fietstazze. Lest haar t regent en lag der n paultje woater op stroat dou ik weer op zo n snelhaidsduvel stòn te wachten, dou e bie t paultje kwam dee e bainen omhoog en ik kreeg t woater over mie hèn, vanoaf dai tied as ik mit auto bie pad bin kiek ik altied nog oet noar dai aine fietser en as k hom tegen kom en der ligt touvalleg n paultje woater…
 
Cor Uildriks