Kwart veur elf

Elke oavend om kwart veur elf den gait hai stoan, rekt zug ais goud oet en goapt mit de bek wied open. Den schudt hai zug en kikt mie mit zien pientere oogjes van onder zien dikke wenkbraauwen aan. Kom op schient hai te zeggen aan t hénde ik mout der oet. Ie snappen denk ik wel dat t om de hond gait, n dikke zwaade bouvier. Mit n poar groode stappen stait e bie de deure en kikt nog n keer achterom. De hond stait veur deure zegt de vraauw, net of ik dat zulf nait zai. Ik kiek nog een keer van de hond noar de kiekdeuze woar op discoverie n film goande is over minsen dai in de wildernis perbaaiern te overleven. Hai mout nog mor eefkes n ogenblikje wachten t is zo recloame zeg ik. Moust zulf waiten zegt ze, mor as hai die t op deel legt kist het zulf weer op himmeln. Mit n daipe zucht kom ik aan t hénde en gai mit hom noar t grasveldje. Elk boompie mout e even aan roeken en dud hai de poode omhoog. Hai mout wel n bloas hebben as n mudzak. Wanneer ik eindelk denk dat e kloar is mout de rugge nog even krom en draait e nog eefkes n dikke drol. Oplucht komt hai den aandroaven en gait noast mie zitten aan kaant van weg en kinnen we weer noar hoes. Dou ik koamerin kwam was t elf uur en was t program op kiekdeuze oaflopen. De hond lag alweer in zien mand op n bonke te kloeven en ik haar t er kold bie kregen en schonk mie nog mor aine in.



Door Cor Uildriks