Veurjoar

As ik tot t roam oetkeek wast ja aibels mooi weer, n lekker zunnegie en achter t glas wast glad waarm. Boeten ist 17 groaden zee Harma Boer net veur Noord en ik leuvde heur vot. Ik mout mor ais wat in toene doun zee k tegen de vraauw t is der net weer veur. Noa t kovviedrinken woar ik ook mor n plakke òl wief nomen haar veur de extra energie bin ik begonnen mit t grasveld oaf te kraaben dikke plukken mos trok ik der oet en doar ontstonden weer n koal stee in t gezon. De hond huilp mie stief mit om de koale steeën alvast wat om te groaven zodat ik der weer wat graszoad in zaaien kon. Dou ik alles weer wat aanveegt en haarkt haar zag t der al weer een stuk schierder oet. Achter op toen heb ik een gloazen kas stoan en dat was mien volgende doul, onderweegs der noar tou kwam ik bie de proemeboom langs, ik haar t ding twai joar leden poot en der was allint nog mor blad aan kommen. Dou k der sikkom langs was zag ik der wat wits inzitten en dou ik goud keek zag ik dat der blui inzat verdult docht ik zel ik der den proemen aan kriegen. In de kas heb ik de grond wat omwuild en der compost bie gooit straks zo ènd april den poot ik der weer wat temoaten en komkommers in… gewoon veur oardeghaid. Hond was mit goan noar kas en was alvast de goeten aan
t groaven woar den loater de planten in mossen, mit n aai over zien kop heb ik hom der veur bedankt. t Bankje bie tuudehok ston vol in de zunne en ik besloot doar mor ais eefkes wat oet te rusten de hond ging op mien vouten liggen zodat dai ook waarm bleven. Met de rugge tegen tuudehok aan zat ik doar ja aibels goud in de zunne, misschain wel te goud want zunder dak der aarg in haar begon ik te nikkebolen en bin k schienboar wat indommelt. Dus dat verstaist doe onder toentjen heurde ik n stem in de verte, dou k kop weer kloar haar zag ik de vraauw stoan mit n kop kovvie in haand, ik docht breng die mor n kop kovvie zelst der wel aan tou wezen noa al dat toentjen. Wie hebben nog eefkes lekker mit ons baaide op t bankje in de zun zeten… heerlek veurjoar.

Cor Uuldriks