Grunneger schriefwedstried

Wel blieven wil, mout schrieven! Dat zol t motto wezen kinnen veur de Grunneger schriefwedstried dij ook dit joar in meert weer holden wordt in de gemainten Mensterwolde, Veendam en Pekel. Der wordt deur n bult lu aal mor meer Hollands proat. Dat is beschoafder mainen n bult minsen, mor wie mouten netuurlek wel ons aigen cultuur n beetje bewoaren. Bie dij cultuur heurt ook de Grunneger streektoal.
Doarom wordt in de moand meert elk joar weer n bult aandacht besteed aan dij toal. Meertmoand dialektmoand hait dat. In dij moand is der veul ale Grunnegers de Grunneger schriefwedstried. Elk dij in de gemainten Mensterwolde, Veendam en Pekel mag doaraan mitdoun. Ie kinnen n verhoal of gedicht insturen noar ploatselke biebeltaik. Doar waiten ze ook hou of de regels veur dailnoame binnen. Even binnenlopen en ie waiten alles. Mor ik kin gain Grunnegers schrieven, heur ik joe al zeggen. Dat huift joe nait weerholden. As ie Grunnegers proaten kinnen, schrief je t verhoal of gedicht mor net zo op as je t zeggen zollen. De jury kikt nait of je de woorden wel goud schreven hebben. t Gaait veuraal om t mooie verhoal of gedicht.
De inzendens worden verdaaild in vief klazzen: Waark van schoulkinder van 8 - 12 joar; gedichten van jongelu van 13 - 17 joar; verhoalen van jongelu van 13 - 17 joar; gedichten veur lu vanof 18 joar en verhoalen vanof 18 joar.
De waarkstokken mouten veur 1 meert inleverd wezen. Op n feestoavend op 23 april worden de priezen uutlangd in Cultuurcentrum Vanberesteyn. Ale dailnemers worden din nuigd en ie kinnen aal joen femilie en vrunden mitnemen. Dus ik zol zo zeggen: der is niks wat joe tegenholden kin. Mitdoun dus! Je waiten mor nooit of je in de priezen valen.

Reactie toevoegen