Dat was t weer
t Is aal joar weer een haile boudel dai kerstdoage en òld en nai. Eten drinken en gezelleghaid. Nou t weer west het bin ik ook wel weer bliede dat we t gewone leven weer oppakken. Her en der zain je nog wat overbliefsels van òld en nai zoas n brandstee of een bultje vuurwaark resstanten. Wie hebben t wel rusteg had klainzeun is bie ons west òld en nai, leutje beudel kon rusteg eefkes bie ons wezen terwiel zien Voar en Moeke òld en nai mit heur vrunden vieren kon. We binnen òld joars oavend rusteg thoes bleven en hebben ons mit wat euliekouken en appelflappen van Baptisten kerk oet Muntendam instalaairt op baanke veur de kiekdeuze. Der was noar ons smoak niks op vanzulf mor wie hadden nog een poar films stoan dai we opnomen haren. t Veurdail is den wel dat je de rekloame blokken deurspuilen kinnen. Ik vind t mor vervelend dai rekloame blokken, een film dai normoal 2 uur duurt kiek je nou sums wel vaaier uur noar zoveul rekloame zit der in. Sums is t ook de reden dat ik t opneem om t den zunder de rekloame te kieken op n loater tiedstip. Om twaalf uur was leutje beudel ook wakker en hebben we veur t roam noar t vuurwaark keken en dat von e wel interessant, al dai kleurtjes in de löcht en de knallen, wat word der weer een geld verknapt zee ik tegen de vraauw, ze nikde en zee… mor t is wel een aibels mooi gezicht en doar haar ze geliek in. Zoas k al zee we begunnen weer mit t gewone leven en vergeten mor gaauw wat we allemoal opeten en dronken hebben. Hest nog gooie veurneems zee mien zeun guster, nou nee aigeliek heb ik doar nog nooit aan doan as je wat willen beveurbeeld stoppen mit roken den mout je der aan tou wezen en dat kin in elk deel van t joar. Wel heb ik een wins, ik hoop dat we een joar tegemuide goan mit minder aansloagen of aandere terroristische gedonder en dat we mitnander wat verdroagzoamer worden.
Beste luu
Ik wìns joe en daiden om joe tou
Veul hail en zegen veur t naaie joar
gelök in groode en leutje dingen
mor veuraal gelök mit mekoar
Cor Uildriks
