t Is al op tied duuster as ik deur Sappemeer hèn rie,en dat stemt joe den wel ais wat somber. Mor wanneer ik den de vroleke lichtjes overaal zai den worden je vanzulf weer blied. t Is ja ook een aibels mooi gezicht overaal dai gelieke verlichte figuren . Suntnikloas is intied ook binnen hoalt en dat geft aan dat der weer veul kinderfeestjes op komst binnen.  Kinder dai heur schountjes weer bie schösstain zetten en den heur veskes zingen zodat goudhailigman der wat in doun zel t is weer tied veur gezelleghaid. Oons kinder binnen al tot deur oet dai wonen op zuch zulf mor wie hebben intied n klainzeun kregen en doar goan wie hèn om soamen mit zien Pabbe en Mamme suntnikloas te vieren. t Is n lekker vrolek kirreltje en wie mouten oppazen dat we hom nait te veul verwènnen. As wie den deur de winkels lopen den word der zoveul speulgoud aanboden dat je gewoon nait waiten wat je kopen mouten t is een overdoad aan plestiek speulgoud en slik,aigliek was ik op zuik noar n hòlten puzel mor dai was nait te vinden en hebben we hom mor wat aans kocht wat we hom oet noam van suntinikloas geven kìnnen. Boeten dat je de kinder wat extra verwènnen kinnen is t ook een mooie gelegenhaid om as femilie ais biennader te zitten in dizze jachtege soamenleven. Vrouger wait ik nog wel dou ik zulf kind was, wassen je der weken veurtied al mit bezeg op schoule en as t den zo wied was en de òlle kirrel op schoule kwam en je mit knikde knainen joen vèrske stonnen te zingen was je blied dat je nait in zwaade Pait zien zak terecht kwammen en je gain puutje zolt kregen zoas mien voar veurspèld haar. En den was stökgelükkeg mit joen kleurbouk en blikje kleurpotloden. Ik wìns joe den ook veul bliedschöp as je Suntnikloas vieren en eh… lot de kerstbaalen nog mor eefkes in kaaste ligget totdat de òlle jong weer vot is.

Cor Uildriks