Mit traain noar Stad

“Ome Jan is morgen joareg” zee Moeke, “As’t zin hest goan wie mit traain noar Stad”. Mien Moeke haar zes zusters en ain bruier. Ome Jan; haar in Stad ‘n gruinte zoak en vente mit peerd en woagen zien doageliekse roete. Ik was ‘n joar of zeuven en ging voak ‘n weke noar Stad as ik vacantie haar. Soms ging ik mit Ome Jan om gruinte en fruit te venten. Hai woonde vlak bie veemaart en doar was ook van alles te doun. ‘s Morgens op tied mozzen wie eerst lopens noar Zuudbrouk en ik wait nog dat mie dat nait mitvuil. Op ‘t station kocht Moeke koartjes en wie gingen in de daarde klas wachtkoamer zitten wachten op de traain uut Winschoot. Eerste, twijde en daarde klas wachtkoamers en ook traainwagons. “Verschil mout der wezen”; zee Moeke, dou ik vruig woarom wie op holten bankjes zitten mozzen en eerste klas op pluus en twijde klas op leer!

Traain raaizen von ik dou al prachteg en spannend en nog; meer as 70 joar loater vind ik ‘t nog aaltied ‘n belevenis. ‘t Moeiste von ik dou de machtege stoomlocomotief. Hai kwam mit vrolijke rookpluumpies aantufken; de hitte van ‘t vuur onder de stoomketel kwam joe tegemuide as je op ‘t station stonnen te wachten. De stoker mit zien zwaarde roetkop kon je soms zain in ‘t weerschien van ‘t vuur! In traain keek ik noar de raaizegers dij op ‘t nippertje nog aan kwamen runnen. De stationchef mit zien spaigelai op ‘n stokje en zien helder flooitje kondegde ‘t vertrek van traain aan.

Station ZUUDBROUK, ‘n prachteg station en nou weer huilmoal restaureerd en tot museum verbaawd, verdween langsoam uut ‘t gezicht.
SAPMEER-OOST, ‘n klaain laif stationnegie; is nou nait meer in gebruuk. “Hier woont mien zuster Hinderkien, heur man waarkt in strokartonfabriek” zee Moeke.
HOOGEZAAND- Was dou ‘n moei olderwets station, is nou allaank oafbroken en vervangen deur ‘n stijlloos bouwsel. Der stapten veul raaizegers in; veul studenten en ook veul aarbaiders dij op zoaterdag nog waarkten.
MAARTENSHOUK- “Hier woont mien zuster Aalbertje, heur man Frederik waarkt op Scholtens-eerdappelmeelfabriek”
Conducteur knipte goatjes in ons koartjes: “Mit Moeke noar Stad tou jong?” Joa, noar ons Ome Jan, dij is joareg vandoage; “Zo, zo”.
KROPSWOLDE- Doar stapte gain mens in. “Woarom stopt e nou as der toch gainend instapt”
“Dat wait de machinist ja nait mien jong”;
“Nee das woar”. Deur ‘t Foxholstermeer wast nog even spannend, mor ‘t ging huilemoal goud. ‘t Is toch knap dat dij machinist zo moei op dij smaalle rails rieden kin! In Stad heb ik nog even onder traain keken hou of dat kon; mor ze hebben raantjes aan de binnenkaant van de roadens last zodat dij der nait oaflopen kin. Toch knap bedocht!!
HOOFDSTATION GRUNNIGEN- Het moei-ste station dij ik oeit zain heb. (Dat kin ik ook nou nog waiten, want ik heb huil veul stations in mien leven zain) De aiken betimmeringen in de wachtkoamers en ook in de hal van de hoofdingang. De prachtege glas en lood roamen van de ingangshal, de plafondbogen en tegelvlouwers. Vandoagdedag volledeg restaureerd in de oorspronkelijke stijl!!
De leste moal dou ik der was zat der zulfst nog ‘n pianist in de hal te pianospeulen; woar kin je dat nog zain!!
‘t Was mor ‘n klaain iendje lopen noar Ome Jan; wie zaten al gauw achter de koffie mit slagroomgebak.

Berend Hooijer